2Cor 3 | DOB | STEP | 'Abo'ama nigeya 'aonaona gagasa nadigega tomota nidi taudi nuwanuwadi 'idi leta 'emiyega nai taudi 'idi leta 'emiya 'igwaegwae 'aene taudi tobobo'adi.

2 Corinthians 3

Loina auwauna manuna

1 'Abo'ama nigeya 'aonaona gagasa nadigega tomota nidi taudi nuwanuwadi 'idi leta 'emiyega nai taudi 'idi leta 'emiya 'igwaegwae 'aene taudi tobobo'adi. 2 Manuna 'omi tuga 'ima letao nidi, be tomota maibo'adi 'emiyega sida sawa, be 'aene 'imi bubuna bobo'ana sida 'ita, be 'enega 'ima guinuwa 'emiya sida mwalamwalatoni 'ibobo'ana, 3 be gote 'enega wae'itadi 'aene 'omi tuga leta Keliso 'enega, Yaubada tauna mayawasina Yaluyaluwanega 'i'etoladina, nigeya 'ebe 'etoladi 'enega nai gulewa bababadi 'ediya, ta esi tomota 'atenaya, ta 'omi 'atuwa leta ga 'a'ebwayaemi tomota 'ediya.

4 Gete manuna Keliso 'ina lemega 'a'atepatu Yaubada matanaya. 5 Nigeya 'aene tauma manuma 'aonaona laga, be 'ada gwae, “Tauma 'ima bobo'ana 'enega guinuwa 'aguinuwedi,” ta esiya Yaubada namo 'igiewaiwaiyema, 6 be sawesawemaya 'ina loina auwauna manuna 'aetoetoguinuwa. Loina nina auwauna nigeya 'eto'etoladina, ta esi Yaluyaluwa Tabuna 'enega, manuna loina 'eto'etoladina mwawasa 'i'ebwa'eda, ta sa'i loina nina Yaluyaluwa Tabuna 'enega yawasida 'i'ebwa'eda.

7 Ta loina kadekadelina mwawasa manuna, ta gulewa bababadi 'ediya si'etoladina, ga Yaubada Mosese 'i'ebwa'ena, maedana sinabwana solanaya, ga Mosese maninina 'enega maedana 'isae ga tupwana 'imiya'amana ta 'enega wate 'isawala, ta tuta nina Mosese manininaya 'isae me Isileli nigeya sawesawenaya be siduneye, 8 'enega tamwalatoni 'aene loina auwauna Yaluyaluwa Tabuna 'enega 'ina maedana esaesa sinabwa wawasae. 9 Loina kadekadelina 'enega tomota bwa'omatana siloba, ta esi loina nina ma ina esaesa maemaedanina. Loina auwauna bubuna palupaluna 'i'ebwa'eda ta 'ina esaesa maedana wawasae. 10 Wate loina kadekadelina 'ina maedana 'ana 'ita 'atuwa sawasawalina, manuna loina auwauna 'ina maedana bobo'ana wawasae. 11 Loina kadekadelina nigeya 'ida miyaataya, ta esi maemaedanina, 'enega tamwalamwalatoni 'aene loina auwauna tauna miyamiya atayana ta maedana wawasae.

12 Tanuwayaina 'aene loina auwauna 'enega tada bobo'ana ataya, ga manuna ta'atepatu, 13 ta Mosese nigeya nadigega 'abo'ada, manuna Mosese maninina maedanina 'iabe 'isasawala, ta 'itala bodebodena be 'aene me Isileli geya'abo si'ita'ita.

14 Ona'ai'aila me Isileli nidi debadi 'ipa'ala, lowaenei ga batuwa, manuna 'etamo tuga gete 'abo loina kadekadelina 'ana sawa sinono, nuwadi sitala bodebodedi 'idi debapa'alega, be geya'abo sinuwanuwa sabwalena, ta Keliso namo sawesawenaya talabodaboda nidi 'i'ewayauledi.

15 Ona'ai'aila, lowaenei ga batuwa, 'abo Mosese 'ina loinao sinonodi, nuwadi sitala bodebodedi be nigeya sinuwanuwa sabwalenidi, 16 ta esi 'eguma 'ebweu yaita 'isanaila, be 'Inapwana 'ena 'iemisa, talabodaboda nina 'i'ewayaule. 17 Ta 'Inapwana tauna yaluyaluwa, ta 'Inapwana nina Yaluyaluwana 'ada toli'ama, 18 'enega nigeya 'ebweu talabodaboda maninidaya 'imiyami, ta 'Inapwana 'ina esaesa maemaedanina 'ena tadunedune, ta tupwana be tupwana 'isa'usa'u gelaseda tauna 'ana 'ita maemaedanina nadigega.

Guinuwa gete 'Inapwana 'enega, tauna yaluyaluwa tuga.